basin mubo na lang kaayo ang panahon
og ang natabonan niini mao na lamang
ang imong pusod
wala na gani ang ubos nga unta ingon
pa silang mga sakto niining kalibotana
imong gikaulaw
usahay makapangyam-id ta sa uban
nga motudlo kanato
kon unsay angayang buhaton
nga sila mismo
nagsangkiig man sa ilang mga
kaugalingong mga piang
makapangagho ko
kahibalo ko kon unsay insakto alang kanako
kahibalo ko kon asa ang nanglabaw
nga akong putlon og asa ang mga mubo
nga akong inat-inaton
ang mga mantsa nga akong papason
ang mga lagom nga akong papution
ang mga puti nga akong
panggaon
kapoy og pamati sa drama nianang radyo
nga hinay na ang baterya
kinsa ba ang angay tuhoan? kinsa ba ang naghipos
anang mga kaayohan sa kamatooran?
nganong mosalig ka man kaniya
nga pareho ra man ang kahayag sa inyong lamparilya?
pamatia lang god ang hunghong sa imong konsyensa
og buhata lang ang sa imong tan-aw
dili makasamad sa imong dughan
dili kini laing desiderata dili kini laing bibliya
pahimangno lang god basin og gani nakalimot ka lang
pagkamubo na lang gayod sa panahon
habog pa kaayo ang akong sak-on og layo pa kaayo kanang akong kab-oton
No comments:
Post a Comment