dili ka usa ka damgo nako sa usa ka babaye

dili ka usa ka damgo nako sa usa ka babaye
nga nagkulob didto sa yuta daplin sa usa ka sapa

usa ikaw ka dayag nga dama sa kamatooran nga akong nahikap
sa mga kamot sa akong panumduman

miingon ang akong tupad sa akong higdaanan
nga ikaw usa lamang ka milamila sa akong kakapoy
og ako naalimungawan lang sa akong katulogon

sa kalapoy sa akong mga unod sa pagkagot sa akong mga ngipon
sa pagkaligti sa akong mga bukog

dili ako motoo niana
kay didtong lugara diin ikaw mikulob og mitalikod kanako
nakita ko ang takdol sa bulan
nakita ko ang mga panganod
nakita ko ang mibuhagay nga busay sa imong likod

nasimhot ko ang kainit sa imong gininhawa
og sa sulod sa akong dughan nadungog ko ang mga awit sa mga anghel

nakita ko ang langit

og sa dihang mibiya ka na kanako
gibati ko ang tumang kamingaw og nakita ko ang pagbatog sa kangitngit
didto sa ulohan sa dagko kaayong mga kahoy

nabati ko ang kabugnaw sa ulan
diri sa akong aping