hamis nga light brown
morag lapok nga gisala og
gipauga sa ilalom sa adlaw
ang mga kamot sa iyang
babaye nga naghawid sa
usa ka iring nga abohon
ang mga mata sa iring og
sa babaye managsama
ang buhok nga taas walay
salapid yano lang kining
nagpatihulog paingon sa
lunhaw nga balilihan
walay imik ang mga ngabil
gipanghimakak ang pahiyom
walay mga kuko ang mga tudlo
walay kandiis ang mga aping
mihangyo ko nga sa likod
butangan lang unta niyag
bisag us ka dahon lang sa antulanga
nga arong ingnon nahulog og
dili ba usa ka tamsi nga naglupad
aron mabati nako ang hangin
aron unta dunay bisag usa man
lang nga naglihok sa iyang kalibotan
wala gayod siya mitoo sa maong sugyot
ang iyang giladlad mao ang karaang mga sulat
nga matod pa niya iyang gilayo-layo
gipahanap-hanap aron dili na nako mabasa
bisan kanus-a pa
No comments:
Post a Comment