paglingkod nako sa bangko
gibutang ang kupo
og gisugdan na ang pagmamutol
sa mga buhok nako nga tag-as
gitutukan ko ang akong panagway
og ang akong nakita mao
ang akong mga kagahapon
ang akong mga gitago nga mga
langgam sa akong dughan
nagsugod og panambo
nanan-aw sa palibot
naglingilingi kon basin
naay mga daotan sa ilang palibot
mitutok kanako ang mga langgam
og mibukhad sa ilang mga pako
usa, duha, tulo, upat, lima, unom
pito, walo, siyam, napulo
mga lunhaw nga langgam nga
nanglupad gawas sa akong dughan
akong gitutukan og sa unahan
sa ilang pangpanglupad
nagpatihulog ra usab sila isip
mga dahon nga nangahulog sa
punoan sa usa ka kahoy
nagpadayon ang gunting sa iyang
pagsabsab sa akong mga buhok og
ang mga buhok nangahulog dapit sa
tiilan sa akong bangko
balik balik ang iyang tingog nga
nadungog sa akong dunggan
og ako nahikatulog
pagkauran-uran gimasehan ang liog
og gipahiran sa barbero ang akong
liog og nawong sa init nga labakara
"ok ra ba sir?" nangutana siya
gitutukan ko ang akong panagway
walay nausob bisan na lang og gamay
" ok ra, tagpila na ba?" tubag sa iyang pangutana
"trenta lang gihapon sir"tubag niya
"diay singkwenta" akong gitunol kaniya.
nanghiwi ka, nangyam-id, asa ba ang balak dinhing dapita?
wala kay nakita nga balak, wala kay angay nga makita
nga arte diha sa pagpaalot sa akong buhok
ang akong gihatag kanimo mao
lamang ang akong kalaay, ang akong gibati nga katulugon,
ang akong kalooy sa mga yanong tawo nga nanginabuhi og wala mangawat sa panudlanan sa atong panggobyerno,
ang akong pagpanghatag sa labaw pa sa imong gipangayo,
sa labaw pa sa angay unta nga ihatag
ang akong mga kalibog og ang akong mga pangutana
nga hangtod karon wala pa gayo'y mga sakto nga tubag
nganong taas ba kaayo ang imong gilaoman kanako?
No comments:
Post a Comment