sa iyang haya

patay na siya
og ang adunay angay nga isulti
misulti

ang tanan nga akong nabati
didto sa tunga sa kapilya
diin siya gihaya
sa iyang katapusang panaw
nagpadayag
sa ilang pagdayeg

ang mga tigulang nga nanan-aw
wala maningog

ang kahilom sa ilang mga konsyensya
mao ang nanugilon sa
matood didto sa milabay nga hangin
og kadtong wala baya nila
madungog kay lagi wala man
giasoy sa kadaghanan

mao kadto ang tinood
kadtong wala gisulti og wala madungog
mao kadto ang tinood ang
tinood og walay lain kundi ang matood

wala usab kini nimo madungog
apan sayod ka
nga mao kini ang tinood

kay ang matood niining atong kalibotan
mao ang wala madungog ang
wala gipanugid

ang konsyensya lamang ang nasayod