kurbi

bawog nga sanga paubos,
kurkubawo nga abaga
buktot,
liko-liko nga dalan,
dili kaayo hago,
apan makalilong,
nianang pagbalik-balik
sa agi
paingon sa bungtod
sa taas
sa kinatumyan
dunay dakong boto
sa sulod
sa akong mga damgo
unsaon ba nimo pagsabot
nga kining kurbi,
bawog,
kurkubawo,
liko-liko
tuyok-tuyok
og ikaw nasuko
kay wala kasabot
kay unsa kadtong
dili nimo masabtan
dili man nimo katulgan

apan kon nasayod ka lang
nga kon ang butang
dili masabtan
tungod kay kini lamian

sulayi puhon ang mga kurbi,
ang mga kurkubawo
ang mga liko-liko
sulayi puhon
ako kang pasaligan
lamian gayod
apan kwidad ka
kay og masipyat ka gani
makamatay usab
ang kasakit niini

apan ayaw kabalaka
sayod ka man
nga kon asa usab
ang risgo
nga kuyaw
ang pilegroso
ang misteryoso kaayo
diha ang himaya
sa dakong kalayo
diha ang lami
bisag walay bahandi.