magtalikdanay kitang duha
sa usa ka gugma nga gidili kanato
og ang atong mga dagkong pader
mao ang atong mga balak
maghimo kitag daghan kaayong mga balak
atong pabag-on ang maong pader
hangtod wala na kita'y madungog pa
hangtod nga ang atong mga pagbati
mangamatay unta
unya sama sa mga lumot
nga nagdili pag-inom anang
mga taligsik sa pebrero
nagmug-ot ang namati nga alibangbang
gihagit ang liso sa kilid
nga naghisgot sa usa ka pagtubo
gitagna nga aduna kuno'y usa ka pula nga rosas
nga nagpahipi sa iyang anino
kuyog ang usa ka bagon
nga lahirong mokatay
nagtangag sa usa ka puti nga bulak
sa iyang punga
ugma,
ugma adunay milagro
mabuhi ang mga patay
og ang mga pader nilang mga balak
mangatumpag
kay ang gugma dili anad anang pagpamakak
dili kaantos anang pagpiyong
sa atong pagpakaaron-ingnon
No comments:
Post a Comment