gabii na usab balik
na sab didto sa silong sa bulan
dyotay lang nga kahayag
ang kinahanglan
niining dyotay
lang usab nga sabot
sa dyotay lang usab
nga panahon
kadtong babaye
nga namaligya sa bulak
sa utot-utot og
kadtong lalaki nga nagsapatos
og itom
baho nga bulak
sinaw nga sapatos
mihubag ang purol
og mibilangkad ang sayal
kadyot lang
og dyotay lang nga panahon
sa dyotay lang nga panagtagbo
pignit lang sa gamayng asin
sa palad paingon sa ngabil
nasayod ang kadaghanan
apan morag wala lang
gagmayng mga dwende
diha sa ibabaw
sa gagmayng
mga bundo sa yuta
dyotayng panahon
balik na usab didto
sa silong sa bulan
gamayng kahayag
dyotayng pignit sa kalipay
ning gagmayng tawo
sa atong katilingban
pagkahuman sa bayle
silong diha sa kalubihan
maglumpong
magpompyang
morag wala lang
No comments:
Post a Comment