kon pangutan-on mo sya kon ganahan pa ba sya nimo
syempre moingon jud sya nga ganahan bisan
kon buot sutaon, gipul-an na sya kay haskang dugaya
na nimong puyo-puyo sa iyang lugar og ang imong baho
dili na nya maantos. Kon imo pang gitiltilan og tigib ang
iyang dughan, mabalian jud kinig ngipon kay atua didto
ang gababag nga lansang.
mohangyo ka nga mobiya una. Kay duna kay adtoon.
Balikan sa makadyot.Dili na nimo isulti. Kasabot sya ana.
Mamutos ka sa imong gamit. Og siya moiyak (konuhay)
og ikaw usab mohawid sa iyang kamot og dayong bungat
nga dili jud unta ka ganahang mopalayo una (konuhay)
moingon siya nga mingawon jud siya nimo, og hawiran
nya ang imong kamot, og hagkan ang imong liog, og
gakson ka, kanang hugot kaayo, og iyang hawiran ang
imong likod, hapohapon, mohagolhol, apan kon makita mo
unta ang imong likod, lahi ang iyang mga mata, nagsulti
sa tinood, morag namikat sa bongbong.
og mao usab ang imong buhaton kaniya, (konuhay
nagsubo ka, morag nawad-an og gana sa kinabuhi)
walay usa ninyo nga gustong taposon ang tanan,
(nga kadugay rang natapos ang inyong gihimo nga pelikula).
ugma wala ka na dinhi. Ihatod ka niya sa airport.
Mosulod ka sa eroplano. Mobabay siya kanimo.
Nagdalidali siyag pauli kay pamil-on ang tanang habol
nga inyong gigamit og palabhan dayon sa katabang.
Alisdan ang mga ugnan. Kuhaon ang imong paboritong
sabon og limpyohan pag-ayo ang kasilyas. Nosnosan.
Kuhaon ang imong picture didto sa frame. Alisdan na niya
og lain. Isuksok una ka niya didto sa mga libro nga dili na
niya basahon.
Og ikaw usab nagdalidali pagkanaog sa plane. Dunay babaye
nga mitagbo kanimo og mikapyot sa imong liog. Naghalok.
Nag-iniyakay. Kamo na usab karon. Nag-uli sa maayong kabubot-on.
All in love is fair. Always. Malipayon ang tanan. Di ba?
No comments:
Post a Comment