nindot ang iyang katarungan sa dihang ako siyang gipangutana
kon nganong nagsulat siya'g balak
na-in love na kuno usab siya
taga bukidnon siya apan ang lugar nga iyang
giingon, cagayan de oro, og dalaga siya nga
napaangkan og gibiyaan og busa ang iyang
anak iya na lang gibuhi sa iyang kaugalingong
paningkamot
nanimpalad sa Dubai nahimong sekretarya
sa usa ka arabo nga haskang datoa
og siya gipangasawa
og maingon ta nga siya nagmalipayon
na hangtod sa kahangtoran
unta motoo ko
apan sa dihang akong gibasa ang iyang
balak lahi ang iyang tonada
lahi ang iyang mga sumbingay
aduna kunoy usa ka itom nga langgam
nga midagit sa usa ka rayna
didto sa usa ka palasyo sa tunga sa paraiso
gipatay ang hari
og ang prinsipe
og ang rayna gitaban paingon sa tumoy
sa kalibotan
og didto ang rayna nagpunay og hilak
apan dili man mamatay
sa kadugayan ang rayna nahimong usa
ka puti nga salampati
og sud didto sa iyang hawla kini
miawit sa usa ka subo
kaayo nga laylay.
mamahimong namakak lang siya
sa balak
og ang tinood mao ang iyang
panghitabo sa Dubai
maayo unta
No comments:
Post a Comment