pag-inosara

sa kaadlawon
mituk-ong ka sa atubangan
sa dagat
gipaabot ang pagsilang
sa adlaw

nag-inosara

nakighimamat ka sa
bugnaw nga kangitngit
sa usa ka hangin
nga mihapuhap sa
pipila ka lugas
sa imong mga pagmahay

nag-inosara ka
nga nakigbisog kagabii
sa imong kangitgit

karon atubangon mo
ang bag-ong adlaw

manaad siya kanimo
og ikaw usab manaad kaniya

nindot paminawon
ang inyong panag-estorya
nianang bag-ong paghimamat

unya pag-abot sa kahaponon
anaa ka na usab diha
magpungko
monamilit sa usa ka kahayag
nga mibiya og napalong

iphon mo ang mga saad nga
wala matuman og siya
mahimoot kay sama kanimo
iphon usab niya ang
mga saad og lain pa nga mga saad
nga bisan kanus-a wala og dili gayod
gihapon matuman

usa lang seguro ang saad
nga imong natuman

ang pagbarog sa pagsubang
og sa pagsalop sa adlaw
ang pagsalom diha sa iyang
salumsom

sa imong pag-inosara
sa imong pagpakahilom

ako usab ania misalom
sa akong kilomkilom