ang imong yanong pangandoy

sa dugay nimong pagtoon sa lain laing mga unibersidad
sa lagyong mga syudad
wala ka gayod kaayo malipay
yano man lang unta ang imong pangandoy
nga ang imong mga palad mohapuhap
sa usa ka lapad og bus-ok nga abaga
nga sa kaanit nagbaga
og unya ang imong mga mata
nga puno sa kalipay
mangihat dayon
diha sa mga bongbong
og mga kisame
og mga bintanang naniklop
og mga pultahan nga nanirado
nga kanimo namatay sa kasina

og siya mosalom sa imong mga sapa
mangita sa usa ka balaanon og danlog
nimo nga isda

og ikaw mopiyong sa imong mga mata
mopahapla sa imong mga pilok
og mapasarasay sa imong mga kilay
sa tumang kalami
ikaw molutaw nga morag kahayag
sa usa ka gamay nga bombilya
sa ibabaw sa salog
og mga lingkoranan
og lamesa

ikaw molupad
sa imong mga pako sa imong mga damgo
nga nangatoman na dinhin niining imong lawak
didto sa tanang mga asul nga panganod
kuyog sa mga nanayaw nga mga bitoon