nabalaka ka

nabalaka ka
kay pagpaingon pa lang nimo
sa pader sa imong balay
wala na makaila kanimo
ang agianan

ang kaniadtong pula nga
pintal
morag nahimo namang maron,
og ang mga bato
morag wala na sa ilang
kanhiay nga pagpahaluna

mao pa ba kaha kini ang
imong balay
ania pa ba dinhi ang imong panimuyo

ang imong pultahan wala na mangamay
og ang mga bintana morag mga
kamot nga nanghinuktok
ang ilang mga agtang
anaa nagsambilay
sa ilang mga kamot
nga bisagra

nabalaka ka og midali ka og sulod
apan sakto ang imong mga pangagpas
wala na sila didto og ang imong nabasa
mao na lamang ang sulat
sa usa ka pagpahibalo

wala man touy abog ang mga lingkoranan
sa imong veranda
apan ang kamingaw namilit didto
nga morag dalikdik
sa imong abaga