gipanghambog nimo ang mga puti nga itlog sa basket
makasalom gani didto ang kahayag sa bulan
og imong makita ang aninag sa imong mga piso nga damgo
nalipay ka kay ugma damlang kini mangapusa na
managhan
matuman ang mga saad
apan sama sa garbo
ang atong makita usahay kutob ra baya sa mga hulagway
dunay dili gayod moabot
dunay dili mahikap
kay dili kini para kanato
dunay matibugok
kay kini alang lang sa yuta
pagkaputi og pagkadagko sa mga itlog sa basket
pagkahuyang nga tan-awon
makalipay
apan makahadlok baya usahay
kon ako pa ikaw
segurohon ko una ang paghikap
ang pagbati sa kahamis sa iyang mga alukaba
og kon mahimo gani halokan mo kini
og idap-ig una sa imong aping
og itupad sa imong dughan
kay kon maligid man kana
og mabuak dili na kaayo dako ang kasakit
nianang mga pag-usik
No comments:
Post a Comment