Ckolohiya

ANG CKOLOHIYA dili dali sabton
abi mo gamot lang ang mga gamot
sayop ka
kay ang ilang mga gamot nga
nagsulay og paglomos kanimo
diha sa imo mismong
balayan
mao lang baya ang mga anino
dunay kahoy nga putol
og ang kaputol
milupad layo sa punoan og
nagkabuang siya og dagan
aron kini madakpan

ang balayan nimo mitungtong
sa kahoy nga patay
ang imong pultahan nangabli
paingon sa mga panganod
ang imong duyanan
maoy imong gihimong hagdanan

makalibog ang imong gipakita
nga hulagway sa imong
kanhiay, sa imong karon
og pati na sa imong ugma

maglantaw lang ko
magpaabot kon kanus-a
mahupay ang kasamok
sa usa ka hulagway
nga imong siging gisapnay

sulayan lang nako kini
og sabot bisan og ako
usab ania nangutkot
kay gustong makabuhi
sa akong mga hikot