GUGMANG WALAY UGMA

naay mga butang nga dili na angay
ipanulti, dili tungod kay nasayod ko
og ikaw nasayod na usab, apan sagad
mao kana ang katarungan, apan ako
adunay dili na angay isulti diha kanimo
og ikaw nakasabot na dayon niana bisan
og dili ko na gani litokon bisag usa ka
pulong lamang, sa nataran niining
mga kasayoran ang mga baba moampo
sa tingog sa kasingkasing, mao kini ang
mga butang nga dili na gani usab nato
ikapanangpit, mao kini ang mga butang
nga pagkalamian gayod nga og matusno
sa dila sa kasingkasing, moambak kini
sa tumang kalipay, molupad kini
paingon sa langit, og dili na gayod
mobalik bisan kanus-a pa, sayran ko
ikaw nga wala pa gayod kini nato
matagamtami, apan hapit na gayod
sa dihang mipiyong ka sa imong mga
mata og imong gihawiran ang akong
kamot og imong gitanyag ang imong
aping og mga ngabil aron kini akong
pagahangkan sa mubo lamang nga
higayon nga kita nagkahinagbo sa
atong karon nga wala nay ugma.