DILI KALIKAYAN USAHAY

dili kalikayan usahay ang
kawalaygana
dili lami ang pagkaon
pait ang baba
dili lami paminawon ang
mga tingog sa mga langgam
morag mga dagom nga
nanuksok og mitusok sa imong
dunggan
ang mga tawo nga imong makita
morag kanunay nga supak kanimo
og ikaw nga adunay nahibaw-an
nga dili unta angayan
imo na lang iluom sa sud
sa imong kasingkasing
makaingon ka nga sayop kini og
kana og mapungot ka maghunahuna
nga ang imong nahibaw-an
ilang gipakisama nga
dili na bililhon
ang imong suba nga kaniadto
ilang gikaligoan
nauga na og ikaw nahisama na
lang sa abog nga ilang
gitrapohan
makita nimo ang ang ilang tan-aw
sa imong kaugalingon nahisama ka
na lamang sa pahiran diha sa pultahan
nga sarang lagoa og dili na gani
angayan nga labhan pa
dapat gilabay na kini sa
basurahan og sunogon

ingon ana ang atong bation usahan
nga og ikaw kulang og salig sa imong
kaugalingon
makaingon ka nga sakto sila
milabay na ang imong panahon
og angayan nga nga mamutos ka
og mobalhin sa lugar sa mga patay
og mga bakol

apan ayaw patoo
aduna kay katungod dinhi
haligi ka kaniadto og haligi ka hangtod
karon og sila nga mopuli kunohan kanimo
ang mga nagpakaaron-ingnon
sayop lang ang sistema og ikaw
ang nahibilin
ayaw basola ang imong kaugalingon
anaa kanimo ang kaligdong
og katarong
ikaw ang magpabilin
og sila ang mopahawa
lingkori ang imong
trono og pasinawa ang imong
espada
sugdan mo na ang pakigbisog
sa gubat sa imong
kaugalingon

anaa ang gamhanang adlaw
og ang labaw pa sa adlaw
siya ang tinood nga
maghuhukom