pisi

sayop gayod baya ang imong paghisgot
kabahin sa pisi sa kabaw
nga gikawat kagahapon lang

natingala ka ngano
nga miundang dayon og kaon
sa iyang panihapon si manang basing
og misulod sa ilang kwarto
nga wala gani mananghid kanimo

makaingon ka nga walay batasan
ang maong tigulang
apan kon nasayod ka lang
unta sa bag-ong nahitabo
sa iyang anak nga nag-eskwela pagkapari
sa usa ka seminaryo
didto sa cor jesu
makasabot ka unta

si nimrod naghikog
gihikot ang iyang liog sa usa ka pisi
didto sa sud sa banyo

wala ka nako maingni
nga walay pamatasan usab ang paghisgot
kabahin anang pisi
sa balay nga adunay
bag-ong namatyan

pisi ang giingon nga hinungdan
sumala pa sa balita ni padre roman.