sa dihang nagbulag na sila
bitbit ang iyang mga damgo sulod sa bulsa sa iyang
mga ilok
mipahiyom siya
anang usa ka bangka nga bulan
sa usa ka kangitngit
wala siya magbasol sama sa bulak nga ulahi
na nga mibukhad
o nagmahay sama sa mga pyuos
nga wala kabukhad nga giputol sa hangin sa kahaw-ang
og nahulog sa dakong wanang
sa iyang nataran
gihubo niya ang iyang sanina
og iyang gibukhad ang kanhiay pa niyang gitago nga mga pako
miabot ra gayod ang panahon
og iyang giangkon nga ang iyang kagikan mao ang mga langgam
karon milupad siya nga gawasnon sa mga rehas
sa iyang gugma nga iya na gayong
hingpit nga gikalimtan
No comments:
Post a Comment