ANG MGA LISO NGA AKONG PATUBOON

Sa akong mga bukton
Akong gihangop ang akong mga uyab
Nga morag mga pungpong sa
Lanzones nga hinog na kaayo
Og ako silang gipangutana
Unsa ba gayod ang akong
Gipangita kaninyo,
Gikutlo ko ang usa ka
Lugas og akong
Gitilawan

Katam-is
Katam-is ba ang akong gipangita
Diha sa mga lusok sa lanzones?

Gitulon ko ang katam-is

Og mikuha na usab ako og
Laing lusok

Kahumok
Kahumok ba ang akong gipangita
Diha sa imong lusok?

Basin og kahumok.

Og tagsa-tagsa ko nga gipanitan
Gitilawan gitam-osan
Gitulon ang mga lusok sa lanzones
Og akong gipangutana kon unsa
Ba ang akong gipangitana
Kanila

Ang akong mga uyab,

Ang ilang lawas,
Ang katahom
Ang kaalam ba?
Ang ilang mga mabuhat
Ba usab kanako?
Ang bahandi?

Tag-sa tagsa ko silang gikaon
Og hangtod nahurot na ang
Mga lusok

Og sa wala na sila
Ako na ang nangutana sa akong
Kaugalingon

Unsa ba gayod ang akong gipangita?

Gugma ba?
Wala diha ang gugma sa mga lusok
Sa katam-is

Nahinumduman ko ang kapait sa liso,
Nga misurop sa akong alingagngag
Nga mitapot sa akong utok

Naghinuktok ko

Ang kapait baa ng kulang sa akong kinabuhi
Kini ba ang akong gipangita

Nangahulog ang mga panit sa lanzones
Nga morag mga dunggan sa akong mga uyab
Nagpundo ang mga nagpasad nga liso
Gipamunit nako og akong gisulod sa akong bulsa
Ugma ako kining ibulad
Og ako kining itanom

Mao kini ang akong gipangita kanila
Dili ang katam-is lamang
Kon dili ang kadtong motubo
Aron mamahimong kahoy puhon alang kanako