ayaw lang kasuko

i. ang kahoy

ania ka na diay
mibatog na usab sa akong
mga sanga
kay ako usa man
ka kahoy
nga namukol
sa mga dahon
nga namulak sa
kaalimyon

batog lang
hanggaba ang hangin
sa kalipay

ii. ang balay

ania ka diay
usab sa akong
balay
nga ang pultahan
abli gayod
sa kanunay
dayon
dali diri
lingkod sa akong
mga lingkoranan
tulog sa akong
higdaanan
sandig ba hinoon
da akong mga
dingding
panambo kon
gusto ka
sa akong
mga bintana
nga naglantaw
sa usa ka
linaw kaayo
nga dagat
diin ang bulan
nga takdol
usab naghay-ad

iii. ang lawak

ang akong lawak
imong lawak
og ang akong
mga bukton
mamahimong
imohon

ang akong mga
ngabil
andam og tagana
sa usa ka init
nga halok
aron lang unta
ikaw mamula
og mabuhi

ang akong lawas
imong lawas
og ang akong
kalag andam
nga makigsandurot
sa usa ka sayaw
nga labaw pa
sa suod nga
higala

iv. ang langit

ang langit ania dinhi
og ang mga anghel
moawit alang kanimo

dinhi ang pahulay
dinhi ang himaya

dinhi ang kasuod
dinhi ang pagtahod

v. ako og ikaw

ako og ikaw lamang
ikaw og ako lamang

niining pagtukaw
sa atong mga kamingaw

vi. og busa

ayaw dalha ang imong
kasuko og kahiubos
nga kon ugaling dili
ka man ganahan dinhi
palihog balik sa imong agi
pasagdi ako nga nagbugtaw
sa akong mga damgo
pasagdi ako nga nagtukaw
sa akong mga kagabhion

ako ang ulipon
ning bathala sa mga bulak
sa mga panganod
sa adlaw sa bulan og sa
mga bitoon

ania naghalad lamang.