ang pagpuyo sa adlaw-adlaw

kon imong kab-uton ang ugma lisod,
kay ang imong kamot mubo ra kaayo para sa iyang katas-on
kahabog og kalapdon

o mokatkat sa taas kaayong punoan
anang ugma
malilong ka baya
og basin mahulog ka na hinoon unya
og mapiang
og sama sa kamatis mapidyat

hinay-hinay lang ang pagpakabuhi
hawiran ang karon
haployon ang agtang nga morag paborito nimong itoy
og ang imong karon morag ikog nga mikiwilkiwil
labi na og ikaw magtaghoytaghoy

ang imong karon mosayaw
mokiaykiay og mobirig-birig kanimo
nga morag nahinangop pag-ayo

ingon ana lang ang saktong pagpakabuhi
ang karon,
ang karon lamang aron dili ka malilong
aron dili ka magsuka

wad-a una ang kabalaka
sa mga hilaw nga bayabas
mangahinog ra lagi kana sila alang kanimo da
sa usa ka saktong
ugma damlag