pagbiya

puti nga t-shirt
karsones nga maong
brown nga bag sa imong kamot
og brown usab nga jacket sa imong abaga
brown nga sapatos

mga laya nga sagbot sa kilid
taas kaayo nga aspaltadong kalsada

init nga adlaw nga naghatag
sa imong anino
udtong tutok sa
mga panganod
nga naglutawlutaw
sa puti nga langit

og ang nagtalikod
nga dako kaayong pangagho
gikan kanimo

sa dihang ikaw mibiya na
og siya mibalak og mihangad sa langit
nga kini iya gayod kuno nga ikamatay

namakak ka sa imong pangagho
namakak usab siya sa iyang mga panganti

pagkapila lang kaadlaw nga nanglabay
nagkita mo balik sa usa ka lugar
nag-uli sa inyong mga handomanan
gusto na usab nga magsugod sa inyong sinugdanan

og ikaw naulaw kanako
nanglad-ok sa imong laway sud sa imong tilaok
og dili na ganahan pa
nga mangambat kanako