Saturday, February 14, 2009

34 ka linya sa usa ka nagsalimuang sa kasakit



  1. Ang paghunahuna anang pagkalunod
  2. Usa usab kana ka pagpili sa kapildihon.
  3. Ang kaparotan mao usab ang pagpili
  4. Sa hunahuna kon unsay iyang gusto
  5. Kon magsakay sila sa barko
  6. Gihunahuna usahay nga adunay dakong
  7. Bagyo nga moabot og kay gamay ra man
  8. Ang barko nalunod kini og imong gipili
  9. Nga ikaw malipay sa ilang kamatayon.
  10. Ikaw usab gipili mo ang maot.
  11. Nalumos ka sa mga papel sa imong
  12. Atubangan. Gilabay ang imong kalag
  13. Diha sa basurahan. Giputolputol ang imong
  14. Mga kamot og tiil. Gitook ang imong liog.
  15. Gilumsan ang imong kasingkasing sa tumang
  16. Kagool og ikaw gipinopino sa
  17. Hait kaayo nga sundang sa imong kapalaran.
  18. Kinsay makapugong nimo sa pagpanunglo
  19. Og paghandom nga unta ikaw mamatay
  20. Maligsan sa tren
  21. Mapusilan karong gabii og ilubong dayon
  22. Pagkaugma bisag wala na ang bendita sa
  23. Pari og ilang mga nobenanobena pa.
  24. Sa imong kasakit og sa imong dugay
  25. Na nga pag-antos
  26. Wala nay pulos ang paghisgot anang
  27. Kalipay, anang pagpakabuhi sama
  28. Sa mga tiki diha sa kisame nga
  29. Nag-atang atang pa gihapon sa
  30. Mga lamok nga nagdinangag
  31. Sa ilang paglupad og pagbatog
  32. Karong gabhiona.
  33. Karon matulog ka, gusto nimo nga
  34. Unta dili na kamata.

No comments: