mY secreT ponD

i.unang panugilon

duna kuno'y inahan nga nahigugma kaayo sa iyang anak
og busa usa ka adlaw niana mihangyo siya sa amahan
nga magbulag na sila kay
gusto na niyang pakaslan ang anak kay
lagi iya man kining gihigugma pag-ayo
og sama sa ubang mga amahan
sarang lang nga iya kining gisupakan
apil na ang tibook katilingban,

og ang inahan kay wala na lagi gayod
nahigugma sa amahan mihangyo nga siya
pagabuhian una sa tagkos sa usa ka kaminyoon
og nagplayo usab siya sa iyang anak
kay naulaw lagi siya sa iyang gibati
nga ginadili sa amahan og sa
katilingban
nga sa iyang anak usab
gilud-an

og busa ang inahan nagpalayo pag-ayo
gitabok ang pito ka bungtod
og pito ka mga lawod og pito ka
mga dagko kaayong mga suba
og ang pito ka mga kontinente

og gikan kaniadto nangita siyag
higugmaon sama sa mga kahoy,
mga bato, mga langgam
mga pangpang
og mga bukid
pati na gani ang mga
ulod
nga makalood

gipangita gayod niya sama kaniadto
ang mga dili mamahimo niyang higugmaon
ang mga butang og mga nilalang nga dili gayod
mahigugma kaniya

pagkamakalolooy gayod hunahunaon
ang iyang kapakyas nga sa tan-aw sa kalibotan
dakong kabuang
nga iyang gituyoan

ii pamalandong

sama kanimo
nga nagsalimuang kay sama kaniya
kadtong inahan nga nahigugma sa iyang kaugalingon nga anak
ang imong gihigugma mao
man ang dili angay higugmaon
og ang mga butang nga
dili gayod bisan kanus-a
mahigugma kanimo

kadtong plato
kadtong kaldero
kadtong duyan
kadtong luwag

nga bisan unsaon dili gayod kana mahigugma kanimo
kay ang plato nahigugma sa kutsara og tinidor
ang kaldero nahigugma sa iyang taklob
ang duyan nahigugma sa lig-on nga pisi
og ang luwag nahigugma man sa bag-ong nilung-ag og sa iyang
angayan nga haw-ason, kutawon og ukayon

nag-ampo ka nga unta magkahinigugmaay na
ang kasili og ang luwag
nga ang kalibotan og katilingban dili na unta mangilabot
nga unta kini makasabot sa imong gibati

apan kanus-a pa kaha sila magkita?
kanus-a pa kaha mahigugma ang kaldero sa iyang sugnod?