ang unang nahungihong mao
ang pagamit unta sa mga
lunhaw og lunsay nga mga lisay
diha sa iyang mga pandong
og mga pamalandong
apan sa pagpanglabay sa daghang panahon
nausob ang plano
kay nausob man lagi usab
ang bag-ong mitumaw og nakita didto
dakong kausbanan ang nahinagboan
sa maong banggiitan nga syudad
kay ang adlaw morag mata
sa usa ka adik nga namula og
nanghubag nga morag dunay
dako kaayong bahad sa usa
ka hinanaling pagsunog
ang mga suga sa mga balay
didto nga mas tag-as pas among
mga lubi nga bahid
wala nay kinatulgan
dili na gani mamilok nga
morag dunay gikasuk-an
ang mga balod sa baybay
mikalit og panagko
og ang ilang mga tingog
morag mga agulo sa usa
ka dakong iho nga gusto
nang motukob og dagkong
mga tawo
nagtuyok tuyok ang adlaw
og ang iyang mga tudlo
morag mga dagom nga
nanusok sa unod sa mga
yuta nga nangauga na
intawon sa pagpamahawa
sa tanang mga bugnaw
usahay sa kagabhion
wala na manunga ang mga
bitoon og ang bulan
gidungog nga gikaon na
kuno sa dakong bakunawa
dapit sa usa ka itom nga isla.
No comments:
Post a Comment