seremonya sa imong pagbiya

ang mga daotan og sakit
nga mga pulong dili na
angay pa nga bungaton

wala na kana silay labot
sa imong pagbiya kay
wala kana silay mga
kamot nga makahawid
sa usa ka pagpahawa

yanohon lang ang seremonya
sa imong paglalin
ibalon nimo ang dyutang kahilom
sud sa bulsa sa imong karsones
tagoon nimo ang usa ka lusok nga luha
sa ilalom sa imong kalimutaw

ang mga abog sa imong sapatos
itaktak sa saktong trapohan alang
sa mga tiil ayaw na diha sa nataran
kay basin og ila pang makit-an

ibilin ang mga dagkong pangagho
kay dili na kana makatabang pa kanimo

pahiyom gamay atubangan sa kalsada
og dayon og bitbit sa imong putos
mopara ka sa bus, pagdali og saka
og lingkod sa atubangan

ayaw na gayod og lingi pa balik
sa imong hapdos nga kagahapon