sa iyang kamatayon ugma puhon
gipasaligan siya sa Nagmugna kaniya
nga ang iyang kalag mosaka na
sa mga ang-ang
paingon sa langit
apan bisan pa niini
anaa gihapon ang mga omang
sa kabalaka nga nagkamang
sa mga baybayon sa iyang huna-huna
mag-unsa na lang kaha ang mga nangabilin?
kinsa na ang mag-amoma
sa mga tanaman sa iyang mga patag?
kinsa na man unya ang molingkod didto
sa silong sa kahoy sa mangga?
kinsa na man unya ang motugway
sa iyang kabaw og
manghipos sa iyang mga bebe
nga kada adlaw mangaligo didto sa sapa?
kinsa na ang maglawog sa iyang anay
nga dunay walo ka buok nga mga baktin?
kon wala nay mogamit sa iyang daro
nabalaka siya nga kini
matay-an lamang
sa kabugnaw sa mga ulan
og hangin
sa kaadlawon
sus Ginoo ko!
gibadlong ka niya
wala ka ba masayod nga silang nangabilin
kon mangamatay
kahibalo ra usab kana sila nga molubong
unya sa ilang kaugalingon?
silang nahikatulog mangmata ra kana
og silang nangmata motultol ra kana sa ilang pagkatulog
niining imong pagpahawa
wala na kini balikay pa
nianang imong pagbatog sa sanga
sa laing kalibotan
lahi na ang imong ngalan
sibo sa imong bag-ong kaugalingon
pagpatihulog na sa himaya
sama sa usa ka dahon
gikan sa patay na nga kahoy
sama sa usa ka gamay
nga bato
tiglom sa lalom kaayo
nga suba sa
kamatayon
buhii ang gihawiran sa imong mga kamot
gamita na ang mga pako nianag paggikan sa mga langgam
kay sa pag-abot nimo didto makalimtan na nimo ang tanan
No comments:
Post a Comment