miawit ang mga dahon
naghisgot ang mga sanga kabahin sa imong
mga kagul-anan og
mga kalipay
nabati kini sa panganod
ang tanan isip matuod og sila nangumusta
kanimo
nabalaka kon naunsa ka na
mitubag ka nga ang tanang gipanulti nila
dili tinood
kay ikaw wala sa kasubo kay ikaw wala
usab sa kalipay
kay ikaw dili ganahan nga tagna-tagnaon
lamang sa mga dahon og mga sanga sa kahoy
nadungog niya ang imong gihunghong sa langit
kabahin sa kataposan sa usa ka dagat
gipangutana ka niya kon unsa ba kini
og miingon ka nga kini usa ka sugilanon lamang
gisakitan siya sa imong gibuhat
apan miingon siya unsa bay kalabotan nimo kabahin
sa dagat, sa mga dahon og sa mga sanga nianang kahoy niya
karon mas nindot ang pagpakahilom
bation na lang nato ang kabugnaw sa hangin
tan-aon na lang nato ang paghunas og pagtaob sa dagat
dili na mahinungdanon ang paghisgot sa bisag unsa pa
apil na niana ang pagnhitabo sa usa ka paggikan
No comments:
Post a Comment