sa gamay pa ako nga bata

sa gamay pa ako nga bata gikuyog
ko ni Nanay syudad sud sa merkado
usa niana ka Pasko og busa daghan
kaayong nagpasad nga mga mansanas
sa mga tindahan daplin diha sa dalan

mansanas nga pula, berde, og uban
pang lami gayod kaayong pang-iton
apan lagi kay si Nanay pobre man,
si Tatay pobre usab, ug ang ilang mga
Tatay og Nanay pobre man usab,

bisan og gapasad ang mga mansanas,
wala gayoy para sa akong palad, wala
gayoy para kanako nga unta akong kitkiton.
tam-oson, usapon,
og itulon dayon

sa akong paghandom og mansanas
nga dili nako maako naghimo akog
akong dako kaayong Mansanas
kanang dili gayod mabulag kanako
sa kahangtoran

og gani ang akong payag ako mang
gibalhin sa tiyan sa Mansanas og akong
gibuhatan og taas kaayong hagdan
aron si Nanay nga akong gikapungtan
apil na si Tatay nga dili makapalit og mansanas
alang kanako
dili na makaduol pa kanako.

Og gikan didto, gitangtang ko ang mga
bugkos sa akong mga kamot
palayo kang Nanay, kang Tatay og
apil na ang ilang parisan nga mga
Nanay og Tatay

nag-inusara ako sa pagdamgo
sa dako kaayong Mansanas diin
ang iyang tiyan mismo maoy akong gipuy-an.

Og gikan didto, nasayran ko nga
ang pagdamgo walay mga hukot
walay mga bongbong walay utlanan

Naa didto ang mga hagdan
Og niining mga hagdan
Og sa gamay kaayong pultahan
Nga akong gihimo
Alang lang kanako
Sa pagdamgo sa matag adlaw
Ako lamang ang Akong gisaligan nga amigo.

Ako lang, ako lang gayod ang Makasulod didto.