melancholia

ang kasub-anan ginganlan nila og melancholia, nga sa ato pa ang kasub-anan usa ka babaye (lamang?), og sa atong naandan ang babaye mao ang huna-huna nga nag-usob-usob sama sa pagbali-bali sa hangin diha sa bungtod.

apan sa akong nakita sa imong baga na kaayo nga kilay, og
luspad na nga mga panit, sa layo na kaayo nga panaw sa
mga kagabhion nianang paggukod-gukod nimo sa mga tiil sa
kaadlawon kay lagi gusto nimong mopahulay, kay kapoy na
kaayo ang imong pamati sa imong mga kuyamoy, morag ang
imong kasub-anan dili na binabaye.

seryoso na kini.mitaas na gani ang imong mga bungot nga misala sa tuba nga imong giyarok matag sayo sa buntag bisan og wala pay sulod ang imong tiyan. Gakutoy ang imong mga panumduman og usahay ang imong mga buhok
nagpakita anang pagsalimuang. Hadlok ang imong mga aping nga unya mabungol na ang imong mga dunggan sa tumang
kalanog sa imong mga kasakit.

giingnan ka ni tatay nimo, kon babaye ang hinungdan babaye ra usab ang saktong tambal. dili ka mamati. gahi ra kaayo ang imong ulo, kay miinsister ka sa imong kahilom. siya og siya lang gayod. walay makahulip kaniya.

sakto ka. babaye ang kasubo, og ang iyang ngalan wala mausob. Melancholia. kanus-a pa ba mahuman ang pagpangahulog sa mga dahon sa imong mga sanga? kanus-a pa ba mahuman ang kusog nga ulansa imong atop? kanus-a pa ba moapaw ang mga suba? kanus-a ba ang dakong baha?
ha? sultihi mi.

lumsi na ang tanan nimong kasakit.
sa imong mga kamot lamang ang ilang
kataposan. nalooy kami kaayo sa imong mga gamot apan wala, wala na kami mahimo.

moabot ra ang adlaw. moabot ra ang bag-ong hangin.
mohawa na ang melancholia.giandam na namo ang mga
baso, ang mga plato og ang mga kandila.