ang baso basa lang gihapon

kapila ko ba ikaw ingnon
nga ang baso
baso lang, nga ang tubig
tubig lang,
nga ang mga panganod
panganod lang gihapon
nga walay bag-ong dalan
nga akong giagian
nga imo nang nahibaw-an
ang tanan og
ang tanan mao lang gihapon
ang tanan

ang kabaw, kabaw ra gihapon
wala mahimong langgam
ang langgam, langgam lang gihapon
wala mahimong dragon
ang isda, isda lang gihapon
wala mahimong sabon

kapila ko ba ikaw ingnon
nga higala ko ikaw
nga ang higala, higala lang gayod gihapon
bisan mabalintuwang pa kining
atong gilingkoran nga kalibotan

kapila ko ba ikaw ingnon
nga ang balak, balak lang,
matinood man o bakak, mabahin ba kaniya
kanimo, o kanako o ni bisan kinsa
ang balak, balak lang gihapon
wala gayod kini mausob
gikan sa una natong panagkaila
sa dihang miiyak ka
sa tumang kamingaw og giiyakan mo
ang akong kamingaw nga imong
gihimong imong kamingaw

ang balak, balak lang gihapon
wala og wala gayod kini
nahimong usa ka danlog nga sabon.