ikaw ba kadtong babaye nga misyagit nga dunay sunog?

kon ikaw kadtong
babaye nga misyagit nga dunay sunog
bisag walay sunog

tungod kay gasulat lang siya
kabahin sa sunog
kon basin og dunay sunog

nan pasayloa siya
kay tagsulat lang siya

nan pasayloa ang babayeng misyagit nga adunay sunog
bisay walay sunog
kay siya nagpakita lang sa iyang tawhanong kabalaka
nga kon unyag dunay sunog
basin og ikaw naagiw na

nauwat na usab siya sa
gahom nianang usa ka balak
nagdilaab man god ang mga pulong
miulbo man god ang tiningob nga mga pagbati
mikuyanap ang kaiinit
sud sa iyang dughan

apan kon matinood man nga aduna gayoy sunog
nan pasayloa
kay nasalagmaan lang kana sa mga pula nga tinta
sa usa ka tagsulat
nga dili tinooray nga manalagna
nga wala maghandom nga siya usa ka manulunda

kon duna man ugaling sunog
hikapa gayod una sa imong mga palad
paminawa ang kalayo dili sa imong
dunggan, dili sa imong kasingkasing,

ipatong ang imong mga kamot sa dila sa kalayo
mismo
ipatilap ang imong mga kumagko
ipasunog ang imong mga kuko

ipaduol ang imong buhok
nga og kon manimaho kang sunog
og pago nga panit sa kabaw
na kana sunog na gayod.