giyarok niya ang usa ka
galon nga tuba
wala niya balibari ang
usa ka case nga beer
duha ka long neck
nga Tanduay bisag
wala pa gani sulod
ang iyang tiyan didto
sa imnanan ni Paloma
dapit sa Biasong duol
sa simbahang katoliko.
sa adlaw man god sa
kasingkasing sa alas
diyes sa buntag dili gayod
kini niya malimtan:
kasal ni Zeny, iyang uyab
nga karaan, gikasal siya
sa laing lalaki nga nauyonan
sa iyang mga ginikanan.
ang adlaw sa kasingkasing
niadtong panahona maoy
unang adlaw sa iyang paghubog
hubog hangtod sa ikatulo ka
tuig sa dihang siya namatay.
sa adlaw sa kasingkasing sa
ikatulo ka tuig gikan kaniadto
nagdayon ra gayod sila ni Zeny
didto sa ganghaan sa dakong
labat nga gibantayan ni San Pedro
dawaton pod kaha si Zeny
nga siya nagpakamatay man
sa usa ka gugma nga matood?
No comments:
Post a Comment