ang tigulang nga babaye

mubo og buhok ang tigulang nga babaye
mas kunot kaayo ang iyang nawong kaysa
iyang tinood nga edad, 70 na siya, og ang
tanang buhok niya puti na, namati pag-ayo
samtang gibista ang kaso sa iyang anak nga
lalaki nga nakapatay sa sulod sa usa ka imnanan
didto dapit sa suok nga lugar sa Tuburan,
sa may videokehan, nakainom man god kuno
og nakalimot na sa iyang gibuhat, og nabunalan
og botelya sa beer ang tawong mitutok kaniya
samtang siya mikanta niadtong mga alas diyes
na sa gabii, gikan sa iyang trabaho sa paghakot
nianang sinako nga semento didto sa pantalan.

detenado ang iyang anak nga lalaki kay walay
ikapyansa. Pagkahuman sa bista, pagka alas
singko sa hapon, miuli kos balay nga duol ra
sa korte, naglakaw ko, og nahikurat ako sa
maong tigulang nga nagpayong og itom kay
medyo ulan-ulan nag-atang sa dapit sa among
pultahan, nangutana siya kon unsaon nga aron ang
iyang anak makagawas usa kay gikan pa sa
Abril 2008 kini nadetener sa prisohan sa
Sindangan, nga sa sulat pa kuno sa iyang anak
haskang maota sa kaon, daghang lamok og gani
tulo pa kuno ang atop, og haskang istriktoha sa
jail warden nga dako og tiyan.

Miisplikar ang tigulang nga wala jud silay kwarta
nga ikapyansa, og wala usab silay titulo nga ikaga
rantiya, og siya miiyak, mipahid sa iyang dagko
kaayong lusak sa iyang mga luha, nga siya gimingaw
nga kaayo sa iyang anak nga nakapatay og tawo nga
detenado sa prisohan sa sindangan nga pagkadaghang
lamok og pagkamaot sa kaon og pagkaistrikto sa
warden didto nga dako kaayo og tiyan, og mihilak
siya og duro, og namahid sa iyang dagkong lusok
nga luha og sa walay pagdikidiki mihangyo kanako
nga " Judge, pwede bag ikaw na lang ang mopyansa
para sa akong bugtong anak nga lalake?"

nabukog ko. dili kini mahimo. nakapanglad-ok ko
sa akong laway, nga morag ako na lay naulaw kay
pastilan, usahay baya sa kabuta nianang gugma sa
inahan, mahimong kataw-anan na man lamang ang
dagan sa atong hustisya og pangagamhanan

wala ko masuko, ako lang giingnan ang tigulang nga
babaye, nga kini dili gayod mahimo.wala gihapon
nako giwagtang ang pagtahod nianang gugma sa usa
ka inahan nga kasagaran mao ra usab ang makapadala
sa ilang mga anak sulod sa mga prisohan.