kabahin sa usa ka tanlag

nalubong na ang imong giluba
ang iyang kasingkasing maayong pagkaguba.
walay nakakita og walay makasulti kabahin
sa imong nahimo
wala ka gani mitago sa mga kahoy og kakugnan
kay walay migukod kanimo

ang mga kahoy nasayod
og mga sagbot wala mahaluna
sa usa ka salaod nga ilang nakita

motabang ba silag tabon sa imong sala?

walay igong baba
ang mga dahon sa kakahoyan
aron motug-an sa usa ka sakit nga panghitabo
sa hayag kaayo nga bulan niining kagabhion
naglutok ang mga mata sa imong gipatay
nga gigaid nimo sa ilalom sa yuta

nangutana ang mga bato ngadto sa adlaw
kabahin sa hustisya
og daghan kaayong tubag ang mga konsyensa:

walay aso nga makumkom
ang gaba dili magsaba og
dili kini sili nga mohalang dayon
ang dila ra unya nimo puhon
ang walay labhag

miingon ang adlaw nga sa ngalan
sa hustisya walay bato nga dili malukat

og ang mga bato nahilom pag-usab
naghinuktok atubangan sa dagat
ang mga pangpang nagyampungad
sa pangutanang-

"Unsa ba ang sunod nga mahitabo?"

karon naglakaw ka sa dalan nga naghubo
daghan kag gipangyamyam nga dili na masabtan

ang mga lapok sa imong mga tiil walay kaulaw
ang imong baba nagbula nga morag nagbukal nga tubig
hait kaayo ang imong mga mata nga morag
sundang nga daghang gustong takbason
og busa ikaw gilikayan sa katilingban
ang mga bata mibuno kanimo og mga bato
og ang mga pulis andam na nga mopusil kanimo


pagkamakalolooy mong tan-awon
gisap-ongan mo sa imong mga kamot ang imong mga dalunggan
nagdagandagan ka sa kadalanan nga walay tumong
walay pahulay, mohunong sa makadyot
og dayon og katawa og iyak.

mipiyong ang mga mata sa babaye
nga imong gigaid sa ilalom sa yuta
og ang gamay nga piso nga ilang gilubong usab didto nadugta na
wala nay angay pang isulti ang iyang mga bukog.

Adunay mga bulak didto nga mibuswak. Pagkaputi!
Gihisgotan ang usa ka layaw nga lubnganan nga
Walay krus.

Adunay alibangbang nga pagkaitom malipayon nga naglupadlupad sa huni sa hangin.
Ang mga dahon sa kakahoyan didto hinay hinay nga nangahulog. Wala na silay pagmahay. Mibarog ang usa ka patay nga kahoy.

Ang mga sagbot nagpadayon sa ilang pagpakahilom sa ibabaw sa bugnaw nga yuta, nagkamang sa usa ka tumong.Ang mga bato
nahaluna og ang pangpang nakighalog sa mga hangin.

Og dinhi natapos ang usa ka balak kabahin sa tanlag.