nadakin-as siya karon
dili nianang panit sa saging nga nasaag sa iyang agianan.
nadakin-as siya sa usa ka dakong sayop
nga ilang nakita og nga unta imong gitagoan apan ulahi na ang tanan.
wala nay daghang away-away pa, wala na ang pagpangutana kon ngano ba?
ang sayop, sayop. Og ang imong dili pagdawat niini dili makapahimo nga
ang sayop mahimong sakto.
dili mahimong mamakak, gipadako mo lang ang imong sayop.
wala ako makiglalis kanimo, gidawat dayon nako ang akong sayop
og gani akong gidawat nga ako ang nasayop og dili ikaw.
nagpasalamat ako kanimo. Minaog ako sa akong trono og miduol ako kanimo.
Nasayop ako. Akong sayop.
gani akong gipakita ang akong tangkag nga dalunggan, ang akong taas nga
ikog nga nagpahimo nako nga ako usa ka dakong kataw-anan.
mikatawa ka. Mikatawa silang tanan. Mikuyog ako sa pagkatawa
nianang dakong sayop nga akong nabuhat.
wala kamo mangayo nga ako mangayo og pasaylo kaninyo.
nangatawa lang kitang tanan.
Gidawat ko ang akong sayop. Nanglimbawot gayod ang akong balahibo
sa akong bukton.
Gihigugma lang gihapon ninyo ako
sa akong dakong sayop nga nahimo.
Sa akong paglakaw-lakaw karon wala na ako mahadlok nga masayop.
Bisan pa og madakin-as ako sa panit sa saging sa akong agianan
og anaa kamong tanan diha nga naglantaw kanako.
Dali lang diay ang pag-angkon, kon ikaw pasaligan nga ikaw ila lang gihapon nga higugmaon.
No comments:
Post a Comment