ang babaye nga imong gihigugma

ang babaye nga imong gihigugma
pagkamaanyag gayod niya.

pagkamahinhin, pagkaloyloy sa
iyang mga mata, pagkabaloron sa

iyang mga pilok, pagkahumok sa
iyang mga kamot nga kon imong

hawiran morag mabati mo ang
mga asul nga kapanganoran

pagkananam sa iyang mga ngabil nga kon
imong pang-uson mas tam-is pas

leche plan nga gibutangan og pulo
ka itlog ni Nanay og upat ka kilo

nga asukar, pagkahumot gayod sa
iyang buhok nga og imong simhoton

mora bag nasimhot mo na ang tanan
mga bulak nga langitnon (naa ba na?)

og ang iyang mga totoy, sus ginoo ko,
pagkabus-ok nga kon imong hawiran

sa imong duha ka palad, mora bag
nahawiran og naduaw mo na ang tanang

mga bukid niining atong kalibotan,
pagkainit sa iyang lawas, nga og imo

na unyang tandayan, mora bag ikaw
naghumol didto sa hot spring sa isla

sa Camiguin, pagkaputi gayod sa iyang
mga paa, mas puti pa sa sikat kaayong

mga balas didtos Boracay, mao kana
ang babaye nga imong gihigugma nga

akong gidulog didto sa usa ka kama
sa usa ka motel didtos Ermita,Manila.