kagabii

miabot ang langgam nga itom
kagabii
og sa akong kahadlok
wala na kaayo nako masinati
kon uwak ba kadto
o unsa ba

aduna siya'y gisulti kanako
nga nakapakurog
sa akong mga kamot
og mga tiil

usa ka kamatooran
alang kanako
maoy ingon niya
og dayon niyag lupad
balik sa iyang agianan
balik sa mga kamot
sa nagpadala kaniya

naglingkod ko balik
sa silong sa punoan sa balite
sa among nataran
namalandong ako
sa iyang mga gamot
og sa pagkabaga kaayo
sa iyang mga dahon

unsaon ta man
andamon ko na lang
ang dili pa unta angay
pa nga mahitabo
kay maoy husga
sa kapalaran


uwak,
oo, uwak kadtong langgama

ang iyang gisulti kanako
mas itom pa sa kagabhion
mas mingaw pa
sa usa ka lugar
nga atong gibisitahan
nga puno kaayo sa kahoy
niadtong usa ka hapon
nga dali kaayong mingitngit
didto sa Jimenez