si tiya dolores

gaitom na si tiya dolores. wala nay gawas gawas sa iyang kwarto. hapit na usa ka bulan. siging tago.
basa basa sa bibliya. tapad niya ang iyang paypay ang pugong sa iyang buhok. ang iyang gamay nga salamin. nanghubag ang iyang mga mata. punay lang god og hilak. nangalaksi na ang pintal sa iyang kwarto
wala niya biraha ang mga naggimaw
wala niya punita ang mga nangahulog
wala niya ambata ang mga tingog sa gawas.
itom ang frame sa iyang antipara,
terno sa iyang sanina og iyang mga tsinelas
og sapatos.

ngitngit seguro kaayo ang iyang kalibotan
kay bisan og hayag na ang adlaw
wala na niya pagnga ang mga suga nga nagsiga.

ingon si nanay ingon ana ang buhaton
sa mga bag-ong nangabalo.
naligsan si delfin sa usa ka trak de carga
namatay gayod diha dayon
wala na gani kaabot sa ospital
sa amogn lungsod.

ingon si nanay, gibuhat lang ni tiya dolores ang angayng buhaton.
angay nga siya pasagdan.

si nanay nag-itom og sinina bisan buhi pa si tatay. nakaingon ko
apan wala koy gisultihan
bisan usa sa ang akong lima ka mga igsoon

si nanay gibuhat lang ang angay niyang buhaton.
ako lang siyang pasagdan.