ang akong mga balak sa kamatooran

kon mangutana ka na gani kon unsa ang tinood
dili ko molikay, dili ko anang lihay-lihay,
kay diha makita nimo ang sayaw sa usa ka bakakon.

dili lang ko motingog, og tan-awon ko ikaw kanang
dili ko mamilok og dayon mangutana ko

ngano?
nganong gusto mong mahibaw-an ang tinood?
nganong gusto nimong mahibaw-an ang kamatooran
bahin kanako nga
unta ang ako nga kamatooran ako
man lang kana, og dili man kana imo.

dili ka usab motingog.
nahilom ka.
seguro nakaamgo ka
nga ako adunay katungod sa akong mga kamatooran
sa paghapnig niini sama
sa paghapnig nimo sa imong
mga bag-ong pinalantsa diha
sa atong dako og karaan nga kaban.

nag-atubang kitang duha isip duha ka misteryo.
dili lima sama sa usa ka rosaryohan nga kasakit.

ang kahilom mao ang tinood nga higala sa kamatooran.
atong tak-omon ang atong mga baba sa mga sakit
nga kamatooran. dili na kini nato isab-wag sa lain pang
nataran, kay sila usab didto nag-amping sa ilang mga kasakit.

usahay,makalimot ka og imo akong pangutan-on
kon nahigugma pa ba ako kanimo?
nianing atong kagabhion
akong gipakita nimo ang akong panghuy-ab,
ang akong gibati nga katulugon.

Sayod ka sa akong tubag. Ang
atong sabot mao ang kahilom lamang.
Sayod ka kaayo niana.
Diha lang kitang duha kutob.