meta4

usa ka lusok nga luha
ang kalibotan

kadali rang nauga
ang luha

gitan-aw niya ang
uniberso sa usa
ka lugas nga
balas

sa iyang kuko
tua ang kawanangan

gipiyong niya
ang payong sa iyang
kasing-kasing

og nakita niya
ang nawong sa iyang
gihigugma

ang iyang kamot
mihakop sa mga balas
nga puti

nangahulog lapos
sa iyang mga
tudlo

pagkadali sa nanglabay
nga mga adlaw

sa paghigop niya
sa kataposang kape
mitutok siya
sa tasa og sa platito

wala na wala na
mitubag ang iyang
luha nga nahulog
sa kilid sa iyang
panyo.