kon imong nabasa ang akong mga balak kaniadto
sa batan-on pa ako
nagbalik-balik ang akong paghandom sa mga
itom nga langgam nga mibatog sa cable wire
gani usa ka adlaw niana akong nasulat ang kabahin sa usa ka langgam nga lahi sa uban kay siya nag-inusara lamang,
lahi sa uban nga nagparis-paris nga morag mga uyab
og dili ba kaha morag mga bana og asawa,
sukwahi siya sa uban nga matawag nato nga normal kay siya, kon taparan, mobalhin, sa layolayo
og anaa makita nga siya
ganahan gayod nga mag-inusara.
Mihunong ako sa paglakaw
mitutok ako kaniya og siya usab
mitutok kanako,
mora ba og gaingon nga:
sus, Dodoy, tan-awa ko,
ayaw og katingala kay ako og ikaw,
ayaw og balibad, ayaw pamakaw,
kay ako og ikaw, akong balikon
kay ako og ikaw, sa klarong pagkasulti
managsama. Ikaw usab nag-inusara.
No comments:
Post a Comment