sa clan reunion

sumala sa naandan nag-clan reunion na pod mi
sa usa ka dakong lugar didto sa Dipolog
daghan ang mitunga

dunay mga natigulang na nga mga oyoan og iyaan
wala ni si papa og mama kay nangamatay na sila
dunay uban nga dili na kakaon og lechon
isda-isda na lang

wala na nagpasad ang beer sa presidential table
patay na ang mga orig nga mga bastasa
nga kusog moyarok og bino
ang mga nangabilin nga mga magulang
gidid-an
na sab pag-inom sa ilang doktor

kon makasulti nimo sila nagsalapid na ang ilang mga dila
ang uban na stroke na
ang uban diabetic
ang uban nagparkinsons

sa program miaarangkada ang mga apo
nga kabalo ng modrama og mosayaw

hayyyy, kaniadto mga puya pa kining mga bataa
karon lahero na moarangkada
dunay nag-reenact sa kanta ni yoyoy
kabahin sa bugno ni magellan og lapu-lapu
duna poy mikanta og
your my baby always
misayaw anang britney spears
og madonna og michael jackson

mikanta, migitara, mi-ballet
dunay autistic nga mikanta og dili na buhian ang mic
"taktak mo, taktak mo, taktak moooooo"
kalooy sab sa bata, morag hubog

makalingaw,
og pag-abot na sa among turno mi-request ang mga paryente
nga mosayaw mi ni emma og tango,chacha ba o boggie
sama sa naandan

hayyy, kada tuig jud?
mibalibad na ko,
kapoy na og si emma mi-voice out
nga mas angayan ang mga batan-on

dili na kami nga nagsugod na
og pamuti ang mga buhok
mi-comment ang akong brother-in-law
nga otro pod nga member sa childless couple incorporated,

"hayy, permanente tang pildi aning reunion
kay wala tay mga anak nga mosayaw'

milingi ko ni emma, og siya mingisi,
mi-signal nga molakaw na kay mosimba pa sa 3 o'clock mass.

sumangil ko og pangihi sa CR
nga dapit sa exit
og siya usab misumangil nga labad ang iyang ulo.

nanggawas mi sa lugar
misulod sa car,
og miuli og sayo sa among balay

actually mihapit sa beach sa Olingan
nagpahangin,
nanglingkod sa daplin,
nga mora mig mga bag-ong uyab.

hayyyy, saon na lang.
mora man og mingaw.