ang pagpanglampaso sa tugas nga salog sa sayo sa kaadlawon

naandan na niya ang pagpanglampaso sa sayo sa kaadlawon
ingon siya pasingot lang aron dili mahayblad
nanagko ang iyang bagtak sa iyang tiil
kay lagi kada adlaw man gayod siya manglampaso

og tuod sinaw gayod ang among salog sa among balay nga karaan
ma-slide ang langaw og ang mga tamsi
nga mosulay og patong matapilod
og dili na kahunahuna og balik

sa edag nga 35 dunay nabihag nga taga-manila
si tio perping og giipon kini niya kanamo
kay ako lagi gipapuyo na man usab sa akong amahan
sa balay ni lola pepay

magsigi sila og away hapit kada buntag
og si estrella nga iyang asawang tagala
nagsigig

"tang-ina punyeta kang perpinga
ka nganong imo man gayod nga pasinawon ang salog sa sayo sa kaadlawon
ang imong kanaas sa lampaso
sigig pukaw kanako nga unta
gusto pa man akong matulog"

kay ang mga tagala tagdugay matulog
og tagdugay usab mangmata
apan si tiyo perping dili gayod pabanban
magsigi gihapon og lampaso sa salog
bisan og ang iyang asawa
siging gisapot

namatay sa konsumisyon si estrella,
nagluto og itom si tio perping,
apan kadyot lang

sa pipila lang gani kaadlaw
nakakita na usab siyag bag-ong uyab
nga iyang gidala sa maong karaan nga balay

si lucila nga lahero usab nga manglampaso sa balay
og busa silang duha sayo sa kaadlawon
nagpunay na og lampaso sa maong balay nga karaan

bisan gani og buros na siya og duha ka bulan
hangtod sa nanganak silag tulo ka mga lalaki
nga ang mga korte sa ilang nawong
napuros na usab mga lampaso

sa pagpanagko sa ilang tulo ka mga anak nga lalaki nagdungan na silang tanang nga tiglampaso sa mga salog sa maong balay nga karaan.

og silang tanan, nagmalipayon sa ilang kinabuhi, nagsigig lampaso sa ilang bag-ong panimalay
tapad sa balay ni lola pepay

seguro ikaw nga nagbasa niini nangita
og lahi unta nga ending sa akong estorya,
(dili kini balak)
apan mao kana ang tinood nga nahitabo,
sa ilang kalibotan nga yano lamang:

ang salog og ang lampaso
og ang kalipay sa ilang pagpamuyo
tungod kay pareho silang tanan og hilig
og kalipay:

ang pagpanglampaso sa salog
nga tugas sa sayo sa kaadlawon.