ang itom nga pintura sa ubos sa iyang pusod

adunay itom nga pintura nga nabutang sa silong sa iyang pusod nakapapukaw sa akong mga nahikatulog na nga mga pagbati

kadtong mora ako og leon nga midagan sa kakahoyan nagtangag sa akong nadakpan nga ihalas nga baboy

kadtong mora ako og agila nga naglupad sa dako kaayo nga kawanangan og ang akong
mga pako dako pa sa nigo
lapad pa sa pultahan sa sabongan

kadtong mora ko og usa ka bagyo nga mihimo og lilo sa unahan sa nonoc island misuyop sa mga gianod og mga nawala

kadtong usa ako ka dakong tsunami nga mihapak sa thailand
og nanghulga sa mga isla sa Pacific Ocean

adunay pintura nga itom sa kilid sa tabonon nga paa
sa usa ka babaye
og didto ko nalangan, mihunong ko didto,
namalandong, kon pwede

gusto nakong hikapon, gusto nakong hagkan
kay kaniadto sa akong dila kana gitila-tilaan

mipiyong ko sa akong mga mata, og ikaw ang akong nakita.
dunay misiplit sa akong dughan nga morag
water fountain sa Luneta.

mipahiyom ka kanako og nangamay sa imong kamot
miisa sa imong tiil og mihinay pag-ingon

"dali na diri kay gimingaw na baya ako
pag-ayo kanimo"

dili ko gustong ibuka ang akong mga mata.
nanginit ang akong dughan, og misakit ang akong pus-on

kay diay ako kaihion.