mY secreT ponD

lalom ako nga suba
nagpakahilom ang akong mga bato og tubig
ang akong mga lapok nagtago sa akong kinailawman
ang akong mga isda giatiman sa akong mga lumot
ang akong mga baki miawit kanako sa akong kaayo

milabay ka
usa ka adlaw niana
og nakita ko ang imong katahom sa akong kiliran
ikaw mipahulay og milantaw kanako

naghandom ka nga unta makita mo ako sa akong hunasan
kanang wala na ang kalalom sa akong tubig

nagool ang mga baki, isda, mga lumot
kay basin sila mamatay sa hunasan
nga imong gipangandoy

mitoo ako kanimo
gihatag ko ang imong gihandom
mihangyo ako sa adlaw nga kuhaon ang akong tubig
aron mo makita ako

ang akong mga bato og lapok sa ilalom
ang nakita mo
baho ako,
ang akong mga bato morag mga hubag sa akong aping,
sa akong tibook lawas
og wala ka makatoo sa kamaot nga imong nakita

miatras ka
mibalik sa imong agi
og wala ko na ikaw makita

sa akong kagool
nalooy ang ulan og mga sapa
gibalik kanako ang akong tubig
og kalalom

miawit pagbalik ang mga baki
ang mga lumot nagpakaon sa mga isda

nagbasol ko ngano nga ako nagpadala
nianang katahom nga dili nako maangkon

gidawat ko na ang akong kahilom
og kon kinsa kadtong akong higugmaon
mao lamang kadtong mahigugma sa akong kalalom

mosalom siya og hikapon niya ang akong mga lapok
og dawaton niya ang akong mga bato
mopuyo siya kanako
sama sa akong mga baki
og isda
uban sa akong mga lumot