siya nga siya

siya dili kunohay mangayo kay dili kuno siya usa ka makililimos
aduna siya'y garbo sa iyang kaugalingon

siya adunay kaisog nga manghulam bisag unsa lang
kwarta, ngalan, sakyanan, og uban pa nga iyang mahulman
adunay siya'y garbo nga kuno dili siya sama sa uban
nga talangayo kay siya adunay gihoptan nga kaikag

mokaon siya sa pamahaw dungan kanimo
mobalik siya sa paniudto kay kuno nalimtan ang iyang kalo
og sa paghungit niya sa dako kaayong lusok sa humba
siya manghambog nga siya naningkamot sa iyang kinabuhi
nga siya dili parehas nianang uban nga nagsalig sa ilang amahan, inahan, igsoon, og mga uyoan

kusog siyang mokaon ug luto, mohigop sa sabaw sa imong tinola nga isdang balarite
kusog siyang moinom sa beer sa imong refrigerator
nga walay kataha nga siya na mismo ang nagkuha niini

maayo siyang modala og estorya kabahin sa mga gustong molansar karong sunod nga eleksyon, sa mga
kalihokan sa sabongan, sa mga bag-ong kabit ni mayor
og sa kaistrikto sa huwes, og sa kakusog mangayo og
amot sa mga maestra labi na ang mga pari

sa nahurot na ang luto, ang humba, ang tinola og ang beer siya nagdalidali og panamilit kay kuno daghan pa
kaayo og buhaton sa ilang balay

og pakalitan ka og hangyo kon aduna ka bay bugas og
gamayng cash, bisag 200 na lang, kay kuno nakalimot siya og palit sa merkado og bugas, og nakalimot siyag withdraw sa rural bank of katipunan

naulog-ulogan ka kay giingnan ka nga nindot kaayo ang pagka-alot sa imong buhok sa atong barbero sa
kilid sa merkado, nga ang tag-iya sa kinadak-an og tindahan sa atong lungsod, adunay kaibog kanimo

mipahulam ka og 500, gipakapinan pa og usa ka gantang nga bugas.

karon, ikaw na lang usa. Nahinumdom ka sa kapuyok sa imong igsoon. Pulo ka buok ang iyang anak. Usa ray
asawa. Tulo ka buok ang iyang kabit. Aduna na siyay apo, kay napaangkan ang iyang kamanghoran. walay klaro ang iyang trabaho. wala ka kahibalo kon unsa ba
gayod ang iyang pangita.

ikaw, biyudo. Walay anak. Dato. Sapian.
Nagpuyo sa tungatunga sa lawod sa kamingaw.