si lola pepay sa iyang mga tugon

i
usa ka lugas nga posporo
idagkot sa imong suga nga dako og pabilo
ang kayo sa pabilo maoy imong ipatakod
sa tulo ka laya kaayong dahon sa lukay

sa pagsiga niini
mao kini ang imong isulod
sa ilalom sa tulo ka uga nga pinutol nga palwa

anaa na ang kalayo nga maoy imong gamiton
sa paglung-ag sa atong pamahaw

ii

kabahin sa paglung-ag sa kan-on
sa duha ka tasa nga bugas
ilunod ang tulo ka tasa nga tubig
aron dili mahilaw-lata ang imong niluto

ipatong ang imong tungang kumagko
og kinahanglan nga ang tubig kutob ra
sa unang linya sa imong tudlo

og kon mobukal na pahinayi ang kalayo
palonga dayon aron dili kalas ang imong sugnod

ang nabilin nga baga mao lamang ang igo-igong kainit nga makaluto sa imong bugas

iii

og kabahin sa atong sud-an
tulo lang ka palotpot nga morag kadako
sa imong palad ang imong lutoon

butangan nimo sa usa ka kutsara nga suka
og tulo ka pidyot nga asin
og usa ka lusok sa ahos
og tubig nga tupong ra usab
sa gihay-aran sa maong palotpot

mao gihapon ayaw palabii og siga
aron dili makalas ang imong sugnod
ayaw na butangi og luy-a
sayang
tungod kay ang kahumot sa ahos
dili matupngan anang gamay
nga kuyamoy sa luy-a

iv

ayaw gamita ang gripo
kay kalas sa koryente
pagsag-ob lang diha sa atabay
kilid sa atong balay
dili ka na mahago
dili sama kanamo kaniadto
nga magsao-ob
pa kami sa tungro
dito sa ikapitong bungtod
sa Marupay

v

usa lang ka litse nga bugas
ang imong kuhaon sa laton
kay dili na mamahaw ang imong lolo jose

og ang palotpot kon tulo man ang imong nalunod usa lang ang kan-a
ugma na usab sa buntag ang usa
kay ang usa maoy akong itula sa panihapon

vi

giihap ko ang mga lugas sa posporo
tulo na lang sila sa ilang balayan
ayaw sipyata ang pagdagkot
ayaw pag-atubang sa hangin
aron dili mapalong

pulo pa ka palwa ang anaa
sa ilalom sa dapogan
ayaw kalimot
ayaw pagdinangag
tulo lang ang imong gamiton

giihap ko ang tanan
dili mo ako mamahimong bakakan

vii

ayaw na lang og tan-aw og sine
gusto ba nimo nga mabaligya kining atong balay aron ka lang makatan-aw
sa bag-ong salida ni vilma santos
og edgar mortiz?

viii

pagtoon sa imong leksyon
basaha ang imong mga libro
ayaw og awat kanamo
nga igo lang kahibalong mopirma
sa among ngalan
og mobasa kon asa paingon
ang Mactan

ix

ogma kay sabado
libwasan mo ang atong kamalig
kay nalata na ang atop

og karong domingo
paghuman og simba
kuyog ka sa imong lolo
manglimas sa sapa
kay dagko na ang mga haw-an
nga didto iyang gitan-ogan

x
ingon ani ang atong kinabuhi
sa atong kapobrehon
dili kita magkalas-kalas
kay igo ra kanato
ang atong gamay nga katigayonan

ang atong gamay nga payag
ang yuta nga giogbukan niini
usa ka kabaw
usa ka daro
gamay nga kamalig sa kilid
sa atong umahan

og ayaw kalimti
ang atong kaligdong
ang pagsulti sa tinood
mao ang atong tinood nga
bahandi