ang numero trese

ang numero trese dili pa kamaong manglipstik
walay make-up,
magbinata pa og dula anang jackstone, rayaraya, ambak ambak sa lastiko, og mosyagit og shatong...

bataot ang numero trese, og dali ra kaayong mosalig sa iyang ig-agaw nga 25,
nga nagplite sa pikas kwarto sa ilang balay,
gipuyok og magnolia ice cream,

nga didto gayod niadtong lawak nga usa ray bintana gipatila siya sa osa ka tam-is nga chocolate flavor
gahi pa kaayo nga usa ka quart nga ice cream,

nagtapis ra sa tualya ang numero 25,
og dunay tuko nga nagbuy-od sa tungatunga

apan wala mag-ambat si numero trese,
salig sa ilang panag-agaw, kay ang iyang inahan og amahan managsoon man,

pila may sugilanon, nahilis ang ice cream
nga wala mahurot nabiyaan sa salog sa maong lawak dunay daghang dugo
ang alugnan sagol sa duga nga pilit-pilit
og langto sa katre sa maong lawak

nga usa ray bintana, wala kasabot si numero 13
sa iyang gibati, sakit apan lami, gusto niyang ibutyag apan dili kaya sa iyang baba og dila,

wala kini niya gitug-an sa iyang inahan
kay basin unya siyag masagpaan,
og si numero 25 luwas, nahuwasan ag iyang lawas, mikatawa sa iyang kaugalingon atubang sa samin, nanaghoy,

gipagawas si numero 13 nga nagkiang.

morag wala lay nahitabo nga talagsaon
atong higayona

og milabay ang mga adlaw
og mga katuigan, hilom ang tanan,
walay nasayod,

nagpista ang balangay, nagtagay,
walay gipatik nga adunay nagdumot
nga nalupigan

si 25? ninong pa sa kasal ni numero 13
mag-agaw, nagkinabaw,
og aron walay samok gilubong
na lang ang tanan sa kalimot

ako ang konsensya ni numero 13,
usahay motiyabaw siya sa usa ka itom
kaayong damgo, diin siya
gitukob sa usa ka walay ngalan
nga bakunawa.

si 25? nag-antos sa kamingaw, kay hangtod kuno
karon, gihigugma pa niya si numero 13.

nagminyo siya,
bulag sa iyang asawa nga numero 38
sud lamang sa 2 ka tuig.